head1
head2
head 3

ഡോ. എഴുമറ്റൂര്‍ രാജരാജവര്‍മ്മയ്ക്ക് ബാല്‍രാജ് പുരസ്‌കാരം

മലയാള ഭാഷയുടെ വളര്‍ച്ചയ്ക്കു സഹായകമാകുന്ന ഉത്തമഗ്രന്ഥത്തിനു നല്‍കുന്ന ഒരു ലക്ഷം രൂപയുടെ ബാല്‍രാജ് പുരസ്‌കാരത്തിന് ഡോ. എഴുമറ്റൂര്‍ രാജരാജവര്‍മ്മയുടെ ‘എഴുമറ്റൂരിന്റെ കവിതകള്‍’ എന്ന പുസ്തകം അര്‍ഹമായി. മലയാളം ലെക്‌സിക്കന്‍ മുന്‍ മേധാവിയും ആദ്ധ്യാത്മികാചാര്യനുമായ ഡോ. ബി.സി.ബാലകൃഷ്ണന്‍, അദ്ദേഹത്തിന്റെയും ഭാര്യ പ്രൊഫ. രാജമ്മയുടെയും പേരില്‍ ഏര്‍പ്പെടുത്തിയതാണ് ബാല്‍രാജ് പുരസ്‌കാരം.

കവിത, നാടകം, വിമര്‍ശനം, ജീവചരിത്രം, സഞ്ചാരസാഹിത്യം, ബാലസാഹിത്യം, തത്ത്വചിന്ത തുടങ്ങി വിവിധ ശാഖകളിലായി നൂറ്റിമൂന്നു കൃതികള്‍ പ്രസിദ്ധീകരിച്ചിട്ടുള്ള എഴുമറ്റൂര്‍, ഡല്‍ഹിയിലെ മലയാള ഭാഷാപഠന കേന്ദ്രത്തിന്റെയും മലയാളം മിഷന്റെയും ശില്പിയാണ്. സംസ്ഥാന സര്‍വ്വവിജ്ഞാനകോശം എഡിറ്റര്‍, കേരള സര്‍ക്കാരിന്റെ ഔദ്യോഗിക ഭാഷാവിദഗ്ധന്‍ എന്നീ നിലകളില്‍ സേവനമനുഷ്ഠിച്ചിട്ടുണ്ട്. ആറ്റുകാല്‍ അംബാപ്രസാദം മാസികയുടെ മുഖ്യപത്രാധിപരും പ്രൊഫ .എന്‍.കൃഷ്ണപിള്ള ഫൗണ്ടേഷന്റെ സെക്രട്ടറിയുമാണ്. മഹാത്മാഗാന്ധി ഏര്‍പ്പെടുത്തിയ വാര്‍ദ്ധാ രാഷ്ട്രഭാഷാപ്രചാര്‍ സമിതിയുടെ ഭാഷാപുരസ്‌കാരം ഉള്‍പ്പെടെ ഒരു ഡസനിലേറെ പുരസ്‌കാരങ്ങള്‍ക്ക് അര്‍ഹനായിട്ടുണ്ട്. ബസ്റ്റ് ഒഫ് ഇന്‍ഡ്യ റിക്കാര്‍ഡ്‌സിലും ലിംക ബുക്ക് ഒഫ് റിക്കാര്‍ഡ്‌സിലും ഇടം നേടിയിട്ടുണ്ട്.

Comments are closed.